तौलिहवा, फागुन । नेपाली कांग्रेस कपिलवस्तु निर्वाचन क्षेत्र नं. २ का उम्मेदवार सुरेन्द्रराज आचार्यले कृषकले भोग्दै आएको मलखाद र सिँचाइ अभावको समस्या समाधानका लागि प्रतिबद्ध भएर लाग्ने बताउनुभएको छ।

कपिलवस्तु जिल्ला अन्तर्गत यशोधरा गाउँपालिकाको विभिन्न गाउँमा आयोजित घरदैलो कार्यक्रमका क्रममा उहाँले आफू कृषककै छोरा भएकाले किसानका समस्या नजिकबाट बुझेको बताउनुभयो। “कृषकका माग सम्बोधन गर्न अब बन्ने सरकारले ठोस कदम चाल्नुपर्छ, त्यसका लागि म संसद्मा पुगेपछि बुलन्द आवाज उठाउनेछु,” उहाँले भन्नुभयो।

घरदैलोका क्रममा मतदाताले मलखाद, सिँचाइ र बाटोघाटो सुधारको विषय उठाउने गरेको उल्लेख गर्दै आचार्यले ती समस्या समाधानका लागि आफू निरन्तर पहल गर्ने प्रतिबद्धता जनाउनुभयो। विगतमा संसदीय बजेटमार्फत सिँचाइ र विद्युतीकरणका क्षेत्रमा काम गरिएको र त्यसबाट धेरै नागरिक लाभान्वित भएको उहाँको दाबी छ।

पाँचवर्षे कार्यकाल हुँदाहुँदै संसद् विघटन भएकाले सिँचाइका लागि विनियोजित बजेट कार्यान्वयनमा जान नसकेको उल्लेख गर्दै उहाँले निर्वाचनपछि रोकिएका योजना पुनः अघि बढाइने बताउनुभयो।

आगामी निर्वाचनमा आफू सफलतातर्फ उन्मुख रहेको दाबी गर्दै उहाँले मतदातामा कांग्रेसप्रति उत्साह देखिएको र यस पटक पुनः विजयी गराउने विश्वास व्यक्त गर्नुभयो।