सुलीकोट, फागुन ३० गते । गोरखामा माइक्रोबस दुर्घटना हुँदा ७ जनाको मृत्यु भएको छ । शनिबार बेलुका सहिद लखन गाउँपालिका–३ कनटारमा मनकामनाबाट फर्कँदै गरेको माइक्रोबस सडकबाट करिब २०० मिटर तल खस्दा ७ जनाको घटनास्थलमै मृत्यु भएको हो ।

जिल्ला प्रहरी कार्यालय गोरखाका अनुसार बागमती प्रदेश ०१–००६ ख ८४३० नम्बरको माइक्रोबस १४ जना तीर्थयात्री मनकामना मन्दिर दर्शन गरेर गन्तव्यतर्फ फर्कने क्रममा अचानक नियन्त्रण गुमाएर सडकबाट तल झरेको थियो ।

१४ जना सवारमध्ये ७ जनाको घटनास्थलमै मृत्यु भएको छ भने ७ जना गम्भीर घाइतेलाई तनहुँको आँबुखैरेनी अस्पतालमा लगिएको जिल्ला प्रहरी कार्यालय गोरखाले जनाएको छ ।

घटनापछि प्रहरी टोली स्थानीयको सहयोगमा थप उद्धार कार्यमा खटिएको छ । माइक्रोबसमा ठ्याक्कै कति जना थिए भन्ने यकिन भइनसकेको र साँझ परेकाले उद्धार कार्य जारी रहेको प्रहरीको भनाइ छ ।

यस दुर्घटनाले स्थानीय बासिन्दा र यात्रुहरूमा शोकको वातावरण सिर्जना गरेको छ । मृतकको पहिचान गर्ने र शवलाई पोस्टमार्टमका लागि अस्पताल पठाउने प्रक्रिया भइरहेको छ । साथै घाइतेहरूको उपचार जारी रहेको छ भने उनीहरूको अवस्था बुझ्ने काम भइरहेको प्रहरीले जनाएको छ । दुर्घटनाबारे विस्तृत विवरण आउन बाँकी रहेको छ ।

राससका अनुसार यहाँको मनकामना मन्दिर दर्शन गरेर फर्किंदै गरेको यात्रुवाहक माइक्रोबस दुर्घटना हुँदा ७ जनाको मृत्यु भएको छ ।

सहिद लखन गाउँपालिका–३ कान्टारमा बा प्र ०१–००६ ख ८४३० नम्बरको माइक्रोबस आज साँझ दुर्घटना हुँदा छ जनाको मृत्यु भएको जिल्ला प्रहरी कार्यालय प्रमुख प्रहरी उपरीक्षक भरतबहादुर विकले जानकारी दिनुभयो । उहाँका अनुसार मृत्यु हुनेमा सबै भारतीय नागरिक छन् ।

माइक्रोमा १३ जना यात्रु सवार रहेको प्रारम्भिक जानकारी प्राप्त भएको जानकारी दिँदै प्रहरी उपरीक्षक विकले घाइते तथा मृतकको पूर्ण विवरण आउन बाँकी रहेको बताउनुभयो ।