कपिलबस्तु । जिल्लाका बाणगंगा नगरपालिकाका सामुदायिक तथा निजी विद्यालय र अस्पतालमा सञ्चालन हुँदै आएका चमेना गृहहरूको अनुगमन गरिएको छ । विद्यालय तथा अस्पतालमा सञ्चालन हुँदै आएको चमेना गृहहरुको अवस्था बुझ्ने उक्त अनुगमन गरिएको हो ।
सो अवसरमा बोल्दै कपिलबस्तुका सहायक प्रमुख जिल्ला अधिकारी पद्मलाल लामिछानेले चमेना गृहहरूको दर्ता, संरचना, सरसफाइ तथा खाद्य सामग्रीको अवस्था परीक्षण गर्दा धेरैले कानुनी प्रक्रिया पुरा नगरेको पाइएको बताउनुभयो । उहाँले भन्नुभयो “दर्ता नगरेर सञ्चालनमा रहेका चमेना गृहलाई अबिलम्ब दर्ता गराउन निर्देशन दिइएको छ”।
अनुगमनको क्रममा घरेलु तथा साना उद्योग कार्यालयका प्रमुख सन्तोष खनालले एक साताभित्र सबै चमेना गृह दर्ता अनिवार्य गर्ने र प्रत्येकले मुल्य सूची स्पष्ट रूपमा टाँस्नुपर्ने व्यवस्था लागू गरिने बताउनुभयो ।
खाद्य प्रविधि तथा गुण नियन्त्रण डिभिजन कार्यालयका प्रमुख राजेन्द्र सिहंह लोधका अनुसार अनुगमनका क्रममा प्रयोगका लागि अयोग्य ठहरिएका आँखाद्य तेलहरू तत्काल नष्ट गरिएको बताउनुभयो । उहाँले भन्नुभयो “विद्यालय र अस्पतालका चमेना गृहमा खाद्य स्वास्थ्य संवेदनशील विषय भएकाले अनुगमनलाई नियमित बनाइएको छ ।”
बाणगंगा नगरपालिकाको ओदारी, सिद्धिपुर, गजेहडा पिपरा लगायतको क्षेत्रमा सञ्चालित करिब एक दर्जन विद्यालय तथा अस्पतालहरुको चमेनागृहमा अनुगमन गरिएको छ । अनुगमनको क्रममा जिल्ला प्रशासन कार्यालयका नासु बाबुराम पोखरेल, पत्रकार लगायतको सहभागिता रहेको थियो ।

भिडीयोमा पनि हेर्नुहोस्