एजेन्सी : रुसको सुदूर पूर्वमा २८ जना मानिसहरु बोकेको यात्रुवाहक विमान मंगलबार दुर्घटनामा परेको छ ।
अन्तर्राष्ट्रिय समाचार एजेन्सी रोयटर्सका अनुसार एन–२६ मोडलको उक्त विमान दुर्घटनामा परी विमानमा सवार सबैको मृत्यु भएको छ ।
विमानमा २२ जना यात्रु र ६ जना चालकदलका सदस्यहरु थिए ।
विमान क्षेत्रीय राजधानी पेट्रोपाभलोभ्स्क–कम्चाटस्काइबाट पलानाको लागि उडेको थियो ।
कमचाटका पेनिन्सुलाको एक गाउँबाट विमानसँगको सम्पर्क टुटेको थियो ।
रुसको नागरिक उड्डयन प्राधिकरणले पनि उक्त विमान दुर्घटनामा परेको पुष्टि गरेको छ ।
प्रधाकरणका अनुसार दुर्घटनास्थल पत्ता लगाइसकिएको छ । रोयटर्सका अनुसार यो विमान समुद्र र जमिनको सीमाक्षेत्रमा दुर्घटना भएको हो ।
तर, बीबीसीले भने यो विमान समुद्रमा दुर्घटना भएको बताएको छ ।
रुसको आपतकालीन मन्त्रालयका अनुसार उक्त विमानमा पलानाका मेयर ओल्गा मोखिरेभा पनि सवार थिए ।
रुसी सञ्चारमाध्यमहरुका अनुसार मौसम सफा नभएकाले उक्त विमान दुर्घटनामा परेको हुन सक्ने बताएका छन् ।
मंगलबार विमान हराउँदा उक्त क्षेत्र बादलले ढाकिएको थियो ।
प्रतिक्रिया
