तालिबानका प्रवक्ता

काठमाण्डाै – अफगानिस्तानमा तालिबान सरकार बनेपछि पाँच पत्रकार पक्राउ परेका छन् । कामचलाउ नयाँ सरकार बनेको भोलिपल्ट नै बुधवार काबुलमा रहेकाे एक पत्रिकाका पाँच पत्रकार पक्राउ परेकाे जनाइएको छ ।

इटिलाट्रोज नामक पत्रिकाका प्रधान सम्पादक जाकी डार्याबीले आफ्ना पाँच सहकर्मी पत्रकार पक्राउ परेकाे पुष्टि गर्नुभएको छ ।

उहाँले सामाजिक सञ्जाल ट्वीटरमा लेख्नुभएको छ, ‘इटिलाट्रोज दैनिक पत्रिकामा कार्यरत मेरा पाँच सहकर्मी पत्रकारलाई तालिबान समूहका व्यक्तिहरूले काबुलबाटै पक्राउ गरेर लगेका छन् ।’

तालिबान समूहले सत्ता नियन्त्रणमा लिएपछि प्रेस तथा अभिव्यक्ति स्वतन्त्रता र पत्रकारका अधिकारको पूर्ण सम्मान गर्दै त्यसमा कुनै अवरोध नगर्ने प्रतिबद्धता अन्तर्राष्ट्रिय समुदाय सामु गरेका थिए । तर उनीहरूले कामचलाउ सरकार बनाएको भोलिपल्ट नै ताजा प्रतिबद्धताको उलङ्घन गरेको भन्दै सर्वत्र आलोचना सुरु भएको छ ।

अन्तर्राष्ट्रिय विभिन्न निकायले प्रेस तथा अभिव्यक्ति स्वतन्त्रताको पूर्ण सम्मान गर्न र मानव अधिकार उल्लङ्घन नगर्न तालिबान समूहलाई अनुरोध गरेका छन् ।

केन्द्रीय राजधानी नियन्त्रणमा लिएपछि सत्ता हातमा पारेको तालिबान समूहले आफ्नो जित भएको तीन हप्तापछि मात्रै प्रारम्भिक सरकार गठन गरेको हो ।