लुम्बिनी समय । संवाददाता
कपिलबस्तु, पुस १७ गते । हरेक नागरिकको सुरक्षामा खटिने प्रहरी आफैमा असुरक्षित रहेमा आम नागरिकले सुरक्षाको प्रत्याभूति पाउन नसक्ने हुँदा प्रहरीको गाँस बास र कपासमा सरकारले विशेष ध्यान दिनु पर्ने लुम्बिनी प्रदेशका प्रहरी नायव महानिरिक्षक नल प्रसाद उपाध्यायले बताउनु भएको छ । विजयनगर गाउँपालिका स्थित ईलाका प्रहरी कार्यालय गणेशपुरको नव निर्मित भवनको उद्घाटन गर्दै उहाँले सो कुरा बताउनु भएको हो ।
नेपाल प्रहरीको अधुनिकिकरण, स्रोत साधन सम्पन्न बनाउने क्षेत्रमा र भौतिक क्षेत्र लगायतको कार्यमा प्रहरीले फड्को मारेको प्रहरी नायब महानिरिक्षक उपाध्यायले बताउनुभयो । उहाँले भन्नुभयो “अझ पनि हामी सन्तुष्ट छैनौ, किनभने जनताको सेवामा २४ सै घण्टा खटिने प्रहरी संगठनको राति सुत्ने समय हुदैन् ।” श्रीमान श्रीमतिको झैझगडा देखि लिएर जघन्य ठुला ठुला प्रकृतिको अपराधको अनुसन्धान र त्यसलाई रोकथम नियन्त्रण गर्न पनि नेपाल प्रहरीको काँधमा रहेको उहाँले बताउनुभयो ।
जनतको सुरक्षा र अन्य व्यवस्थापकिय काममा प्रहरी अहोरत्र खटिने भएकोले स्थानिय तहको महात्वपूर्ण भुमिका रहेको सहायक प्रमुख जिल्ला अधिकारी अनिल पौडेलले बताउनुभयो । नवनिर्मित भवनले जिल्लामा कार्यरत प्रहरी कर्मचारीहरुलाई सेवा प्रवाह गर्न सहज बनाउनको साथै आवासको सुविधाले थप हौसला प्रदान गरेको सहायक प्रजिअ पौडेलले बताउनु्भयो ।
जिल्ला प्रहरी कार्यालय कपिलवस्तुका प्रमुख प्रहरी उपरीक्षक प्रेम बहादुर बस्नेतले २४ सै घण्टा ड्युटीमा रहनु पर्ने प्रहरी कर्मचारीहरूलाई भौतिक सुविधा सम्पन्न यस्ता भवनले थप मनोबल बढ्ने बताउनुभयो । सुविधा सम्पन्न भवन प्राप्त भएसँगै जोश र ऊर्जाका साथ नागरिकहरूको जिउधनको सुरक्षामा खटिन कार्यरत सम्पुर्ण प्रहरी कर्मचारीहरूलाई निर्देशन समेत दिनु भएको थियो ।
कार्यक्रम सम्बोधन गर्दै विजयनगर गाउँपालिका उपाध्यक्ष लक्ष्मी कुमारी चौधरीले जनताको जीउधनको सुरक्षाको प्रमुख जिम्मेवार रहेको प्रहरी सुरक्षित भयो भने मात्र सयौँ नागरिक सुरक्षित हुने बताउनु भयो ।
नवनिर्मित भवन लुम्बिनी प्रदेश सरकारको नियमित बजेटबाट २ करोड ३६ लाख ४४ हजार २ सय ४२ रुपैयाँ लागतमा साँढे २ तल्ले भवन निर्माण सम्पन्न भएको हो । कार्यक्रममा कपिलबस्तुका प्रहरी उपरिक्षक प्रेम बहादुर बस्नेत, शसस्त्र प्रहरी बल २८ नं. गणका शसस्त्र प्रहरी उपरिक्षक सुर्य बहादुर सेन वलि, गाँउपालिकाकी उपाध्यक्ष लक्ष्मी कुमारी चौधरी लगायत स्थानीय जन प्रतिनिधिहरू, नागरिक समाजका प्रमुख तथा प्रतिनिधिहरू, स्थानीयका सहभागित रहेको थियो ।
तपाईको प्रतिक्रिया !