कपिलवस्तु । जिल्लाको महाराजगंज नगरपालिकाको पडरियामा अवस्थित श्री भद्र माध्यमिक विद्यालयमा बिदाई तथा शुभकामना कार्यक्रम सम्पन्न भएको छ । विद्यालयका अवकाश प्राप्त, सरुवा भई अन्य विद्यालयमा जाने र शिक्षक सेवा आयोगबाट स्थायी रूपमा नाम निकाली जानु भएका शिक्षकहरूको बिदाई तथा शुभकामना कार्यक्रम सम्पन्न गरिएको हो ।
विद्यालय व्यवस्थापन समितिका अध्यक्ष आदरणीय निरु सिंह रायमाझीको अध्यक्षता, महाराजगंज नगरपालिकाका प्रमुख प्रशासकीय अधिकृत दिपेन्द्र रेग्मीको प्रमुख अतिथ्यतामा भएको कार्यक्रममा शिक्षा, युवा तथा खेलकुद शाखाका प्रमुख जगत बहादुर गाहा लगायतको सहभागिता रहेको थियो ।
साथै कार्यक्रममा विद्यालयका शिक्षक–शिक्षिका, विद्यार्थी तथा सरोकारवाला व्यक्तिहरूको उल्लेखनीय उपस्थिति रहेको थियो । कार्यक्रममा बिदा हुँदै गरेका शिक्षकहरूलाई माला लगाई सम्मान गरिएको र विद्यालय परिवारले उनीहरूको भविष्य सफल र उज्ज्वल होस् भन्ने कामना व्यक्त गरेको थियो ।
प्रमुख प्रशासकीय अधिकृत रेग्मीले विद्यालयको निरन्तर प्रगति र गुणस्तरीय शिक्षाको लागि सबैको सहकार्य आवश्यक रहेको बताउनुभयो । उहाँले भन्नुभयो, “शिक्षक राष्ट्र निर्माणका आधारस्तम्भ हुन् । तपाईँहरूले जुन समर्पणका साथ सेवा गर्नुभयो, त्यसले विद्यालयको गौरव बढाएको छ । अब नयाँ स्थानमा गएर पनि त्यही प्रतिबद्धता र समर्पण देखाउनुहुनेछ भन्ने विश्वास लिएको छु ।”
त्यसैगरी विद्यालयका प्रधानाध्यापक राम किसुन चौधरीले बिदा हुँदै गरेका शिक्षकहरूको योगदान विद्यालयको विकासमा महत्वपूर्ण रहेको बताउँदै कृतज्ञता व्यक्त गर्नुभयो । उहाँले भन्नुभयो, “तपाईंहरूका अनुभव, परिश्रम र समर्पणले विद्यालयलाई आजको स्तरमा पुर्याएको हो । नयाँ कार्यस्थलमा पनि तपाईँहरूले यस्तै उत्कृष्ट उदाहरण प्रस्तुत गर्नुहुनेछ भन्ने हाम्रो विश्वास छ।”
कार्यक्रमको सञ्चालन विद्यालयका शिक्षक कुलप्रसाद भण्डारीले गर्नुभएको थियो ।
प्रतिक्रिया
