अनुदानको मल ब्यवस्थापन गर्न गठित जिल्ला मल ब्यवस्थापन समिति कपिलवस्तुले अनुदानको १०२ बोरा मल किराना पसललाई बिक्री गर्ने कृषि सहकारीलाई कारबाही गर्न कृषि सामाग्री कम्पनी लिमिटेड प्रादेशिक कार्यालय रुपेन्देहीलाई पत्रचार गरेको छ ।

यो मल अर्घाखाचीको मालारानी गाउपालिका ६ स्थित फूलबारी साना किसान कृषि सहकारी संस्था लिमिटेडले गत मंसिर १ गते कृषि सामाग्रीबाट किनेको थियो । गत पुस ५ गते नगरपालिका वडा नम्बर १० स्थित पचेहरामा रहेको मनोज किरान पसलमा लुकाई राखेको अवस्थामा १ सय २ बोरा अनुदानको मल प्रहरीले बरामद गरेको थियो । प्रहरीको प्रतिबेदनको आधारमा गत पुस ११ गते समितिको संयोजक तथा सहायक प्रमुख जिल्ला अधिकारी पदम लामिछानेको अध्यक्षमा बसेको बैठकले अनुदानको मल बेच्ने बिक्रेतालाई अनुदानको मल वितरण व्यवस्थापन कार्यविधि २०८२ अनुसार कारबाही गर्न लिखित निर्णय समेत गरेको थियो ।

समितिको निर्णय अनुसार कृषि ज्ञान केन्द्रले पुस ११ गतेको चलानी नम्बर २ सय ३६ बाट कृषि सामाग्रीको प्रादेशिक कार्यालयलाई कारबाहीकालागि पत्रचार गरेको हो । कार्यविधि विपरित आफ्ना क्षेत्रका किसानलाई बितरण गर्ने भनी उपलब्ध गराइएको मल किराना पसललाई बेचिएको प्रहरी प्रतिबेदनमा छ । प्रहरी प्रतिबेदन र मुचुल्का अनुसार बिक्रेता सहकारीलाई छानबिन गरी कार्यबिधि अनुसार कारबाही गर्न निर्णय सहीत पत्राचार गरिएको समिति संयोजक लामिछानेले बताए ।

‘हामीले अनुदानको मल किराना पसलमा बेच्ने बिक्रेतालाई कार्यविधि अनुसार कारबाही गर्न कृषि सामग्रीलाई पठाएका छौ’ उनले भने । उनले अनुदानको मल कालोबजारी गर्ने र कार्यबिधि अनुसार काम गर्ने कृषि सहकारीलाई निग्रानीमा राखिएको बताए ।

गत पुस गते किराना पसलमा राखिएको अवस्थामा ४० बोरा युरिया र ६२ बोरा डिएपी मलसहित गोरखनाथ बानियाँलाई पक्राउ गरेको थियो ।

१ लाख ६६ हजार मुल्य कायम गरी सो मलसहित पक्राउ परेका बनियाँलाई प्रहरीले आवश्यक कारबाहीका लागि राजस्व अनुसन्धान कार्यालय बुटवल पठाएको थियो । बरामद मल कृषि सहकारीले सो किराना पसललाई बढी मुल्य लिई बाटो मै बेचेको थियो । अर्घाखाची, पाल्पा, गुल्मी, कास्की, स्याङ्जा लगायतका जिल्लामा कृषि सहकारीले लैजाने अनुदानको मल कपिलवस्तु र रुपन्देही लगायतका तराईका जिल्लामा बेच्ने गरेको किसानहरूले नै बताएका छन् । पहाडतर्फ युरिया र डिएपी मल त्यति प्रयागे गर्ने चलन नभएकाले कृषि सहकारीले पाउने कोटा सेटिङमा बढी मूल्य लिई बेच्ने गरेका छन् ।