काठमाडौँ । सहकारी रजिष्ट्रारको कार्यालय, गण्डकी प्रदेशले लामो समयदेखि निष्क्रिय रहेका ३५ वटा सहकारी संस्था खारेज गरेको छ। प्रदेश सहकारी ऐनको व्यवस्थाअनुसार निरन्तर कारोबारविहीन रहेका सहकारीहरूको दर्ता रद्द गरिएको कार्यालयले जनाएको छ।

रजिष्ट्रार कार्यालयका अनुसार माघ १० गते सार्वजनिक सूचना जारी गर्दै थप नौवटा सहकारी संस्थाको दर्ता खारेज गरिएको हो। यसअघि नै २६ वटा सहकारी खारेज भइसकेका छन्। गण्डकी प्रदेश सहकारी ऐन, २०७५ को दफा ७१ उपदफा (३) बमोजिम लगातार दुई वर्षसम्म कुनै आर्थिक कारोबार नगरी निष्क्रिय रहेका सहकारीहरू खारेजीको प्रक्रियामा ल्याइएको कार्यालयले स्पष्ट पारेको छ।

माघ ९ गतेको निर्णयअनुसार स्याङ्जाका चार, पर्वतका चार र नवलपुरको एक गरी कुल नौ सहकारी संस्था खारेज गरिएको सहकारी रजिष्ट्रार भेषराज रिजालले जानकारी दिए। उनका अनुसार निष्क्रिय सहकारीहरूलाई गत असार १५ गते ३५ दिने सार्वजनिक सूचना जारी गरी अद्यावधिक हुन आग्रह गरिएको थियो। सो अवधिमा विवरण नआएका संस्थामध्ये यसपटक नौवटा खारेज गरिएका हुन् भने केही सहकारी अझै खारेजीको प्रक्रियामा रहेका छन्।

रजिष्ट्रार रिजालका अनुसार बागलुङ जिल्लामा पनि लामो समयदेखि निष्क्रिय रहँदै आएका र अद्यावधिकमा नआएका सहकारी संस्थालाई खारेज गर्ने तयारी भइरहेको छ। निष्क्रिय सहकारीसँग सम्बन्धित कुनै दायित्व बाँकी रहेमा ती दायित्व सम्बन्धित सञ्चालक तथा जिम्मेवार पदाधिकारीकै जिम्मामा रहने गरी खारेजी प्रक्रिया अघि बढाइएको उनले बताए।

हालसम्म गण्डकी प्रदेशको नियमन क्षेत्रभित्र रहेका ३५ सहकारी संस्था खारेज भइसकेका छन्। जिल्लागत विवरणअनुसार सबैभन्दा बढी १२ वटा सहकारी स्याङ्जामा खारेज भएका छन्। त्यसपछि गोरखामा ६, पर्वतमा ५, तनहुँमा ४, कास्कीमा ३, म्याग्दीमा २ तथा लमजुङ, बागलुङ र नवलपुरमा एक-एकवटा सहकारी संस्था खारेज गरिएको रजिष्ट्रार कार्यालयले जनाएको छ।

ऐनमा व्यवस्था भएअनुसार लगातार दुई वर्षसम्म विवरण तथा प्रतिवेदन पेस नगरी निष्क्रिय रहेका सहकारी संस्थाको दर्ता खारेज गर्न सकिने प्रावधानका आधारमा कारबाही प्रक्रिया अघि बढाइएको कार्यालयले स्पष्ट पारेको छ। साथै खारेज भएका सहकारी संस्थाले तिर्न वा बुझाउनुपर्ने कुनै दायित्व बाँकी रहेमा सम्बन्धित सञ्चालक तथा जिम्मेवार व्यक्तिले भुक्तानी गर्नुपर्ने जानकारीसमेत दिइएको छ।

हालै खारेज गरिएका सहकारीमध्ये स्याङ्जाको वालिङ नगरपालिकास्थित टापु भञ्ज्याङ कृषि सहकारी संस्था लिमिटेड, कटौजे अदुवा उत्पादक सहकारी संस्था लिमिटेड, चापाकोटा गाउँपालिकाको खड्क कालो कृषि सहकारी संस्था लिमिटेड र सरोवर कृषि सहकारी संस्था लिमिटेड रहेका छन्।

त्यस्तै पर्वतको कुश्मा नगरपालिकास्थित गहते पखरा दुग्ध उत्पादक सहकारी संस्था लिमिटेड, प्रगति कफी सहकारी संस्था लिमिटेड, पूर्णेश्वर कफी सहकारी संस्था लिमिटेड, पर्वत आदर्श नमूना कृषि सहकारी संस्था लिमिटेड तथा नवलपुरको हुप्सेकोट गाउँपालिकामा रहेको भूपूसैनिक सहकारी संस्था लिमिटेडको दर्ता पनि खारेज गरिएको छ।