काठमाडौँ । त्रिभुवन अन्तर्राष्ट्रिय विमानस्थलबाट हङकङ जान लागेका एक चिनियाँ नागरिकको साथबाट करिब ४६ लाख ३७ हजार रुपैयाँ बराबरको नेपाली तथा विदेशी मुद्रा बरामद भएको छ।

त्रिभुवन अन्तर्राष्ट्रिय विमानस्थल सुरक्षा कार्यालयका अनुसार क्याथे प्यासिफिक एयरवेजमार्फत हङकङ जान लागेका ७२ वर्षीय चिनियाँ नागरिक सुओलाङ (राहदानी नं.ईएल ७३४०६४४० लाई नियमित सुरक्षा जाँचका क्रममा उक्त मुद्रा भेटिएको हो।

उनको साथ तथा लगेजमा नेपालीसहित विभिन्न देशका मुद्रा फेला परेपछि रकमको स्रोत र प्रयोजन खुल्न नसकेको भन्दै प्रहरीले नियन्त्रणमा लिएको जनाएको छ।

प्रहरीका अनुसार उनको साथबाट ११ लाख ८६ हजार नेपाली रुपैयाँ बरामद भएको छ। त्यस्तै, ५२ हजार ७९० चिनियाँ युआन, ५ हजार ९६५ अमेरिकी डलर, ४१ हजार ९९० हङकङ डलर, २ हजार ६६० युरो र ५० अस्ट्रेलियन डलर बरामद गरिएको छ।

बरामद विदेशी मुद्राको नेपाली मूल्य करिब ३४ लाख ५१ हजार रुपैयाँ रहेको सुरक्षा कार्यालयले जनाएको छ। नेपाली र विदेशी मुद्रा गरी कुल बरामद रकमको मूल्य करिब ४६ लाख ३७ हजार रुपैयाँ पुगेको छ।

बरामद रकमको स्रोत तथा प्रयोजनबारे थप अनुसन्धान आवश्यक देखिएपछि चिनियाँ नागरिकलाई मुद्रासहित सम्पत्ति शुद्धीकरण अनुसन्धान विभाग, हरिहरभवन, पुल्चोक, ललितपुर पठाइएको विमानस्थल सुरक्षा कार्यालयले जनाएको छ।

प्रहरी उपरीक्षक राजकुमार सिलवालका अनुसार घटनाबारे प्रचलित कानुनबमोजिम थप अनुसन्धान तथा आवश्यक कानुनी कारबाही अघि बढाइनेछ।