बाँके, कात्तिक ४ गते । बाँकेको बैजनाथ गाउँपालिका–८ टिटिरियामा एयर पेस्तोल देखाएर ज्यान मार्ने धम्की दिएको आरोपमा एक युवक पक्राउ परेका छन् ।

पक्राउ पर्नेमा स्थानीय २८ वर्षीय सन्दीप चौधरी रहेका छन् । उनले सोही स्थानका २९ वर्षीय श्यामकुमार थारुको किराना पसलको आँगनमा बुधबार विवादका क्रममा एयर पेस्तोल देखाएर ज्यान मार्ने धम्की दिएको प्रहरीले जनाएको छ ।

मादक पदार्थ सेवन गरेका चौधरीले पेस्तोल देखाएर धम्की दिएको सूचना प्राप्त भएपछि प्रहरी चौकी रनियारपुर दहवा र इलाका प्रहरी कार्यालय धनौलीबाट खटिएको टोलीले उनलाई पक्राउ गरेको हो ।

प्रहरीले चौधरीको साथबाट एक थान एयर पेस्तोलसमेत बरामद गरेको छ । घटनाबारे थप अनुसन्धान भइरहेको प्रहरीले जनाएको छ ।