अर्जुन तिवारी
कपिलबस्तु, असोज २८ गते । भन्सार छली गरी भारततर्फ निकासी तथा नेपालभित्र पैठारी गर्न खोजिएका सामान सहित एक व्यक्ति पक्राउ परेका छन् ।
इलाका प्रहरी कार्यालय कृष्णनगरबाट खटिएको प्रहरी टोलीले नगरपालिकाको वडा नंं २ यात्रुगेट नजिकैबाट नेपालबाट अबैध रूपमा भारततर्फ लैजान खोजिएका सामान बरामद गरेको हो । प्रहरीले सो क्रममा ७४१ के.जी. किवी फल वेवारिसे अवस्थामा फेला पारेको थियो । बरामद किवी फलको अनुमानित मूल्य रु. १ लाख ८५ हजार २५० रहेको प्रहरीले जनाएको छ । बरामद फलसामग्री आवश्यक कारवाहीका लागि भन्सार कार्यालय कृष्णनगर बुझाइएको हो ।
त्यसैगरी मायादेवी गाउँपालिका–४ गौरास्थित भित्री सडकखण्डमा दोहनीबाट गौरातर्फ जाँदै गरेको ना २ ख ९५५२ नं.को ट्रकलाई प्रहरीले चेकजाँच गर्दा ट्रकभित्र बिलबिजक विना राखिएको ५ हजार ७३० के.जी. पुरानो प्लास्टिकका टुक्रा (कबाड) फेला पारेको जनाएको छ ।
उक्त प्लास्टिक कबाडको अनुमानित मूल्य रु. ३ लाख १५ हजार १५० र ट्रकको मूल्य रु. १२ लाख गरी जम्मा रु. १५ लाख १५ हजार १५० बराबर रहेको प्रहरीले जनाएको छ ।
ट्रक चालक जिल्ला रुपन्देही मायादेवी गाउँपालिका ६ बस्ने ४१ वर्षीय सुग्रिम केवटलाई नियन्त्रणमा लिई आवश्यक कारवाहीका लागि राजश्व अनुसन्धान कार्यालय, बुटवल पठाइएको जिल्ला प्रहरी कार्यालय कपिलवस्तुका प्रहरी नायब उपरिक्षक रिपेन्द्र कुमार सिंहले बताउनुभयो ।
प्रतिक्रिया
संबन्धित समाचार
