तौलिहवा(कपिलबस्तु), साउन १४ गते । कपिलवस्तु अस्पतालका डाक्टरहरूको लापरवाहीले कपिलवस्तु नगरपालिका ७ धमौलीकी सुत्केरी महिलाको मृत्यु भएको भन्दै मृतक परिवार र स्थानीयबासीले अस्पताल र प्रशासन अगाडी बिरोध प्रर्दशन गरेका छन् । ३० वर्षीय चनरमती यादवको अप्रेशन गरी गत साउन ७ गते अस्पतालमा सकुशल बच्चा जन्माइएको थियो । सुत्केरी महिलालाई पिसाब फेर्न समस्या आए पछि अस्पतालले डाक्टरहरुको सल्लाह अनुसार महिलालाई थप उपचारका लागि भैरहवामा मेडीकल कलेज पठाएको थियो ।
त्यहा उनको ४ दिन सम्म उपचार भएको थियो । उपचारको क्रममा मृगौलामा समस्या देखिए पछि २ पटक श्रमितिको डायलिसिस गरिएको मृतकका श्रीमान राजेश यादवले बताउनुभयो । ३ दिन अघि श्रीमतिको मृत्यु भएको उहाँले बताउनुभयो । उहाँले श्रीमतिको उपचारमा कपिलवस्तु अस्पतालका डाक्टरले लापरबाही गरेको र अप्रेशन गर्दा मृगौला तर्फको नशा काटिएकाले यस्तो समस्या आई अनाहकमा श्रीमितिले ज्यान गुमाउनु परेको उहाँको भनाई छ ।
उहाँले आफ्नो ३ वटा सन्तान सामान्य अवस्थमा नै बच्चा जन्मेको र अहिले भने डाक्टरको लापरवाही देखिएको बताउनुभयो । मृतकको शव एम्बेलेन्स मै राखेर अस्पताल र प्रशासन कार्यालयमा बिरोध प्रर्दशन गरिएको थियो । प्रर्दशनकारीले दोषीलाई कारबाही र मृतकका परिवारलाई उचित क्षतिपुर्तिको माग गरेका छन् । उनीहरुले डाक्टर बिरुद्ध नाराबाजी समेत गरेको थिए ।
कपिलबस्तुका प्रमुख जिल्ला अधिकारी जर्नदन गौतमका अनुसार घटनाबारे आवश्यक कारवाहीका लागि नेपाल मेडिकल काउन्सिलमा पठाइएको बताउनुभयो । मेडिकल काउन्सिलको प्रतिबेदन अनुसार प्रक्रिया अगाडी बढाइने उहाँको भनाई छ ।
कपिलवस्तु अस्पतालका मेडिकल सुपरिटेंडेंट डा.किशोर बन्जाडेले मृतक महिलाको अप्रशेन पछि समेत अवस्था सामान्य रहेकोमा पिसाब फेर्न समस्या आए पछि थप उपचारका लागि रिफर गरिएको बताउनुभयो ।
मेडीकल कलेजमा समेत ४ दिन सम्म उपचार भएको थियो । मृतक महिलाको शवको पोस्मर्टम लुम्बिनी प्रादेशिक अस्पतालमा गरिएको थियो । ३ दिन सम्म शवको पोस्मर्टम हुन सकेको थिएन ।